Munosabat

Tinchlik va mehmondoʻstlikka tayangan turizm – barqaror taraqqiyot va yangi ish oʻrinlari drayveri

boshqaruvchiboshqaruvchi
aprel 2, 2026 - 06:52
aprel 2, 2026 - 06:59
 0  10
Tinchlik va mehmondoʻstlikka tayangan turizm – barqaror taraqqiyot va yangi ish oʻrinlari drayveri

Oʻzbekistonning turizm salohiyati soʻnggi yillarda sifat jihatidan mutlaqo yangi bosqichga koʻtarilib, izchil ravishda oʻsib bormoqda. Bugungi kunda turizm nafaqat iqtisodiy tarmoq sifatida, balki xalqimizning azalий maʼnaviy qadriyatlari — tinchliksevarlik, millatlararo totuvlik va mehmondoʻstlik anʼanalariga tayangan holda shakllanayotgan oʻziga xos sivilizatsion hodisa sifatida namoyon boʻlmoqda. Mazkur omillar yurtimizni xalqaro maydonda jozibador manzilga aylantirib, sayyohlarga nafaqat boy tarixiy-madaniy meros, balki insonlar oʻrtasidagi samimiylik va ochiqlik muhitini ham taqdim etmoqda. Shu nuqtayi nazardan, turizm iqtisodiy faoliyat doirasidan chiqib, madaniyatlararo muloqotni chuqurlashtiruvchi va global gumanitar aloqalarni mustahkamlovchi muhim omilga aylanmoqda.

Joriy yil 1-aprel kuni Oʻzbekiston Respublikasi Prezidenti Shavkat Mirziyoyevning “BMT Turizm” bosh kotibi Shayxa Nosir Al Novays bilan uchrashuvi turizm sohasining strategik ahamiyati ortib borayotganini yana bir bor tasdiqladi. Samarali muloqot doirasida turizmni rivojlantirishda xalqaro hamkorlikni kengaytirish, ilgʻor tajribalarni joriy etish va milliy turizm modelini institutsional jihatdan mustahkamlash masalalari alohida ahamiyat kasb etdi. Bu esa, oʻz navbatida, Oʻzbekistonning jahon turizm tizimidagi oʻrni va nufuzini yanada oshirishga xizmat qiladi.

Mamlakatimizning boy madaniy-tarixiy merosi — Ipak yoʻli shaharlari, noyob meʼmoriy obidalar, asrlar davomida shakllangan milliy anʼanalar va maʼnaviy qadriyatlar turizm industriyasining mustahkam resurs bazasini tashkil etmoqda. Davlat rahbari tashabbusi bilan amalga oshirilayotgan islohotlar mazkur merosni asrab-avaylash, qayta tiklash va uni zamonaviy turizm talablariga mos ravishda taqdim etishga qaratilgani bilan ahamiyatlidir. Bu esa turizmni oddiy ekskursiyalar yigʻindisi emas, balki kompleks madaniy mahsulot sifatida rivojlantirish imkonini bermoqda.

Soʻnggi yillarda turizm infratuzilmasini modernizatsiya qilish, xizmatlar turini diversifikatsiya qilish, transport va logistika tizimini takomillashtirish, ayniqsa aviqatnovlar geografiyasini kengaytirish boʻyicha keng koʻlamli chora-tadbirlar amalga oshirildi. Yangi muzeylar, madaniy markazlar va xalqaro tadbirlarning muntazam tashkil etilishi mamlakatning turistlik jozibadorligini sezilarli darajada oshirdi. Natijada, soʻnggi sakkiz yil davomida yurtimizga tashrif buyurgan sayyohlar soni olti barobar oshib, qariyb 12 million nafarga yetdi. Bu esa turizmning iqtisodiy oʻsishga qoʻshayotgan ulushi ortib borayotganini yaqqol koʻrsatadi.

Ayniqsa, turizm sohasining rivojlanishi mehnat bozorida muhim tarkibiy oʻzgarishlarni keltirib chiqarmoqda. Ushbu sohada yaratilayotgan ish oʻrinlari koʻp tarmoqli va multiplikativ taʼsirga ega boʻlib, nafaqat doimiy, balki mavsumiy bandlik imkoniyatlarini ham kengaytirmoqda. Mehmonxona biznesi, jamoat ovqatlanishi, transport xizmatlari, gidlik faoliyati, hunarmandchilik va suvenir ishlab chiqarish kabi yoʻnalishlarda yangi ish oʻrinlarining paydo boʻlishi aholi daromadlarining barqaror oʻsishiga xizmat qilmoqda. Shu bilan birga, turizm islohotlari xizmat koʻrsatish sohasining jadal rivojlanishini ragʻbatlantirib, milliy iqtisodiyot tarkibida uning ulushini oshirishga olib kelmoqda.

Prezidentimiz rahbarligida amalga oshirilayotgan ulkan islohotlarning strategik maqsadi turizmni iqtisodiyotning drayver tarmoqlaridan biriga aylantirishdan iborat. Xususan, 2030-yilga qadar sayyohlar sonini 20 million nafarga yetkazish va turizmning yalpi ichki mahsulotdagi ulushini 7 foizga olib chiqish vazifalari belgilangan. Bunday koʻrsatkichlar turizmning mamlakat iqtisodiy oʻsishidagi hal qiluvchi rolini yanada kuchaytirishga qaratilganini koʻrsatadi.

Xalqaro hamkorlik ushbu jarayonning muhim tarkibiy qismi hisoblanadi. “BMT Turizm” bilan hamkorlik doirasida Samarqand shahrida Bosh Assambleyaning oʻtkazilishi, Xalqaro turizm akademiyasining tashkil etilishi va “Ipak yoʻlida turizm” ofisining ochilishi mamlakatimizning jahon turizm infratuzilmasidagi oʻrnini yanada mustahkamladi. Shuningdek, Oʻzbekiston tashabbusi bilan 2027-yilning Xalqaro barqaror va yashovchan turizm yili deb eʼlon qilinishi mamlakatimizning global tashabbuskor sifatidagi nufuzini oshirayotgan muhim omildir.

Xulosa qilib aytganda, Oʻzbekistonda turizm sohasi iqtisodiy oʻsish manbai sifatida shakllanish bilan birga, milliy qadriyatlar, tinchlik va mehmondoʻstlikni jahonga namoyon etuvchi strategik platformaga aylanmoqda. Davlat rahbari tomonidan amalga oshirilayotgan izchil va chuqur islohotlar esa ushbu sohani barqaror taraqqiyot, ijtimoiy farovonlik va keng qamrovli bandlikni taʼminlovchi kuchli drayver sifatida mustahkamlamoqda.


 

 

Ulashov Aliboy Rashid o‘g‘li,
Toshkent davlat iqtisodiyot universiteti
“Iqtisodiyot nazariyasi” kafedrasi katta o‘qituvchisi

Teglar:

Oldingi maqola

O‘zbekistonda elektron tijorat rivojida raqamli iqtisodiyotning roli

boshqaruvchi
boshqaruvchi

Tegishli xabarlar

STRATEGIK SHERIKLIK MUNOSABATLARINI O‘RNATISH – ISTIQBOL KAFOLATI

STRATEGIK SHERIKLIK MUNOSABATLARINI O‘RNATISH – ISTIQBO...

boshqaruvchi Iyun 11, 2025  0  22

Taʼlim va fanga qaratilayotgan ustuvor eʼtibor

Taʼlim va fanga qaratilayotgan ustuvor eʼtibor

Moderator aprel 23, 2025  0  28

TIL TA’LIMI: INSON KAPITALINI RIVOJLANTIRISHDA MA’NAVIY FAROVONLIKNING POYDEVORI

TIL TA’LIMI: INSON KAPITALINI RIVOJLANTIRISHDA MA’NAVIY...

boshqaruvchi Iyun 14, 2025  0  20