Oʻzbekiston va Buyuk Britaniya: sinovdan oʻtgan savdo-iqtisodiy hamkorlik yangi bosqichda

Foto yuz.uz saytidan olindi.

boshqaruvchi

Iyun 29, 2026 - 02:08

Iyun 29, 2026 - 02:10

0 2

Oʻzbekiston va Buyuk Britaniya: sinovdan oʻtgan savdo-iqtisodiy hamkorlik yangi bosqichda

Jahon iqtisodiyotida raqobat ustunligi tabiiy resurslar yoki geografik joylashuv bilangina emas, balki mamlakatlarning xalqaro hamkorlikni qanchalik samarali yoʻlga qoʻya olishi bilan ham belgilanmoqda. Xususan, investitsiyalarni jalb etish, zamonaviy texnologiyalarni oʻzlashtirish, innovatsion boshqaruv tajribalarini tatbiq etish va global moliyaviy bozorlarga integratsiyalashuv iqtisodiy oʻsishning muhim omiliga aylanmoqda. Shu nuqtai nazardan, Oʻzbekistonning Buyuk Britaniya bilan rivojlanib borayotgan strategik hamkorligi mamlakatimizning uzoq muddatli taraqqiyot maqsadlariga xizmat qiladigan muhim yoʻnalishlardan biri sifatida namoyon boʻlmoqda.

Joriy yilning 25-iyun kuni Oʻzbekiston Respublikasi Prezidenti Shavkat Mirziyoyev Buyuk Britaniyaning sobiq Bosh vaziri, Global oʻzgarishlar instituti raisi Toni Bler bilan uchrashdi. Mazkur muloqot ikki davlat oʻrtasidagi siyosiy va iqtisodiy muloqotning izchil davom etayotganini yana bir bor tasdiqladi. Uchrashuv davomida mamlakatimizda amalga oshirilayotgan islohotlarni ekspertlik jihatidan qoʻllab-quvvatlash, investitsiya muhitini yanada yaxshilash, zamonaviy boshqaruv tizimlarini joriy etish hamda uzoq muddatli rivojlanish strategiyasini shakllantirish masalalari muhokama qilindi.

Taʼkidlash joizki, Oʻzbekiston va Buyuk Britaniya oʻrtasidagi savdo-iqtisodiy hamkorlik sifat jihatidan yangi bosqichga koʻtarildi. Oʻzaro savdo hajmining besh yil davomida ikki baravarga oshgani, shuningdek, London fond birjasida Oʻzbekistonning 15 milliard dollardan ortiq davlat va korporativ obligatsiyalari muvaffaqiyatli joylashtirilgani xalqaro investorlarning mamlakatimiz iqtisodiyotiga boʻlgan ishonchi ortib borayotganini yaqqol namoyon etmoqda.

Buyuk Britaniyaning rasmiy savdo statistikasi ham ushbu ijobiy tendensiyani tasdiqlaydi. Unga koʻra, 2025-yilning ikkinchi choragi yakunlangan toʻrt chorak davomida ikki davlat oʻrtasidagi tovar va xizmatlar savdosi 1,6 milliard funt sterlingni tashkil etgan. Mazkur koʻrsatkich ikki tomonlama iqtisodiy aloqalarning barqaror oʻsish surʼatlariga ega ekanini hamda mavjud salohiyat hali toʻliq ishga solinmaganini koʻrsatadi.

Toshkent xalqaro investitsiya forumi ham Oʻzbekistonning investitsiyaviy jozibadorligini namoyish etuvchi muhim xalqaro maydonga aylandi. Forumda Buyuk Britaniyaning yetakchi biznes vakillari faol ishtirok etgani mamlakatimizda amalga oshirilayotgan islohotlar xalqaro ishbilarmon doiralarda katta qiziqish uygʻotayotganidan dalolat beradi. Bu esa kelgusida sanoat, infratuzilma, moliya va yuqori texnologiyalar sohalarida qoʻshma loyihalar sonining ortishiga xizmat qilishi mumkin.

Uchrashuvda Toshkent xalqaro moliya markazi hamda Xalqaro raqamli texnologiyalar markazini rivojlantirish tashabbuslariga alohida eʼtibor qaratildi. Bunday markazlar nafaqat xorijiy kapitalni jalb etish, balki xalqaro moliyaviy xizmatlar, innovatsiyalar va startap ekotizimini rivojlantirish uchun ham muhim platformaga aylanishi kutilmoqda. Shu bilan birga, Oʻzbekistonning 2050-yilgacha boʻlgan rivojlanish konsepsiyasini ishlab chiqishda xalqaro ekspertlar tajribasidan foydalanish zarurligi qayd etildi.

Toni Bler Yangi Oʻzbekistonda amalga oshirilayotgan keng koʻlamli transformatsiya jarayonlariga yuqori baho berar ekan, iqtisodiyot, moliya, huquqiy infratuzilma, farmatsevtika, muhim minerallar, raqamli texnologiyalar va innovatsiyalar yoʻnalishlarida hamkorlikni kengaytirish uchun katta imkoniyatlar mavjudligini taʼkidladi. Ayniqsa, moliyaviy markazlarni rivojlantirish va ingliz huquqi tamoyillarini qoʻllash boʻyicha Buyuk Britaniya tajribasi Oʻzbekiston uchun muhim amaliy ahamiyatga ega ekani qayd etildi.

Kelgusida qoʻshma investitsiya loyihalarini amalga oshirish, yirik texnologik kompaniyalarni jalb etish, sunʼiy intellekt, raqamli iqtisodiyot va innovatsion boshqaruv yechimlarini keng joriy etish ustuvor vazifalar sifatida belgilandi. Shu bilan birga, yashil energetika, maʼlumotlar markazlarini rivojlantirish va zamonaviy raqamli infratuzilmani yaratish masalalari ham istiqbolli hamkorlik yoʻnalishlari sifatida eʼtirof etildi.

Bugungi kunda Oʻzbekiston iqtisodiyotini modernizatsiya qilish, investitsiyaviy muhitni yanada yaxshilash hamda xalqaro moliyaviy makondagi oʻrnini mustahkamlash yoʻlidan qatʼiy bormoqda. Bu jarayonda Buyuk Britaniya bilan rivojlanayotgan strategik sheriklik nafaqat investitsiyalar oqimini koʻpaytirish, balki ilgʻor bilimlar, zamonaviy texnologiyalar va samarali boshqaruv tajribalarini mamlakatimizga olib kirishda muhim omil boʻlib xizmat qiladi.

Xulosa qilib aytganda, Oʻzbekiston va Buyuk Britaniya oʻrtasidagi hamkorlik oddiy savdo aloqalari doirasidan chiqib, innovatsiyalar, raqamli iqtisodiyot, sunʼiy intellekt, moliyaviy xizmatlar va davlat boshqaruvi kabi strategik yoʻnalishlarni qamrab oluvchi keng qamrovli sheriklik darajasiga koʻtarilmoqda. Mazkur hamkorlikning izchil rivojlanishi Yangi Oʻzbekistonning raqobatbardosh iqtisodiyotini shakllantirish, xalqaro investorlar ishonchini mustahkamlash va mamlakatning uzoq muddatli barqaror iqtisodiy oʻsishini taʼminlashda muhim omillardan biri boʻlib qoladi.

Zaynutdinova Umida Jalalovna,
Toshkent davlat iqtisodiyot universiteti, Iqtisodiyot nazariyasi kafedrasi dotsenti

Teglar:

TURIZM VA EKOLOGIK BARQARORLIK “Yashil” energetika va “yashil” transfer xizmatl...

boshqaruvchi

boshqaruvchi

Tegishli xabarlar

OLIY TA’LIMDA GLOBAL STANDARTLAR SARI: O‘ZBEKISTON TAJRIBASI VA YANGI YO‘NALISHLAR

OLIY TA’LIMDA GLOBAL STANDARTLAR SARI: O‘ZBEKISTON TAJR...

boshqaruvchi Iyun 21, 2025 0 15

O‘ZBEKISTONDA “YASHIL” ENERGETIKA VA QAYTA TIKLANUVCHI ENERGIYA MANBALARINING RIVOJLANISHI

O‘ZBEKISTONDA “YASHIL” ENERGETIKA VA QAYTA TIKLANUVCHI ...

boshqaruvchi Iyun 11, 2025 0 14

O‘ZBEKISTONDA TURIZM SOHASI JADAL RIVOJLANMOQDA

O‘ZBEKISTONDA TURIZM SOHASI JADAL RIVOJLANMOQDA

Moderator Iyun 26, 2026 0 6