PREZIDENT NAZORATIDAGI ISLOHOTLAR: NATIJADORLIK VA JAVOBGARLIK SARI QADAM
Yangi O‘zbekiston taraqqiyot yo‘lida dadil va qat’iy qadamlari bilan ajralib turmoqda. Mamlakatimizda amalga oshirilayotgan islohotlar chuqur o‘ylangan, tizimli va xalq manfaatlariga yo‘naltirilgan tarzda olib borilayotgani, har bir qarorning zamirida odamlar hayotini yaxshilashga qaratilgan yondashuv mujassamligi yaqqol sezilmoqda.
Shu nuqtai nazardan qaralganda, Prezidentimiz Shavkat Mirziyoyev tomonidan bildirilgan muhim tashabbus — topshiriq va tadbirlar ijrosini ta’minlash maqsadida maxsus shtab tuzilishi va bu jarayonning bevosita Prezident nazoratida bo‘lishi haqida bayon qilingan fikrlar, davlat boshqaruvida mutlaqo yangi sifat bosqichiga o‘tilayotganidan darak beradi.
“Umuman, aytilgan topshiriq va tadbirlar ijrosini nazorat qilish uchun shtab tuzilishi, bu masala shaxsan Prezident nazoratida bo‘lishi ta’kidlandi.”
Bu fikrlar orqali davlat boshqaruvida mas’uliyat, shaffoflik va natijadorlik mezonlariga asoslangan yondashuv tobora mustahkamlanib borayotgani ko‘zga tashlanadi. Endilikda har bir qaror, har bir chora-tadbir ijrosi doimiy va samarali nazorat ostida olib boriladi, ularning natijasi esa real ko‘rsatkichlar asosida baholanadi.
Bunday yondashuv birinchi navbatda ijro intizomini kuchaytiradi. Davlat organlari faoliyatiga tizimli yondashuv, aniq maqsadlar va mezonlar asosida baho berish tamoyili tatbiq etilmoqda. Har bir rahbar o‘z faoliyatini faqat bayonotlar emas, balki amaliy natijalar orqali isbotlashi kerak bo‘ladi.
Shuningdek, shaxsiy javobgarlik tamoyilining kuchaytirilishi ham muhim ahamiyatga ega. Agar ilgari ba’zi hollarda topshiriqlar bajarilmasdan qolgan bo‘lsa, endilikda bunday holatlarga mutlaqo yo‘l qo‘yilmaydi — har bir topshiriqning ijrosi uchun aniq mas’ul belgilanishi, befarqlik va loqaydlikka qarshi qat’iy choralar ko‘rilishi ko‘zda tutilmoqda.
Bundan tashqari, ushbu tashabbus xalq manfaatlarini bosh mezon sifatida ilgari surish tamoyilining amaliy ifodasidir. Prezident tomonidan masalaning shaxsan nazorat qilinishi — amalga oshirilayotgan islohotlarning har bir yurtdoshimiz hayotiga bevosita ta’sir ko‘rsatishi, ularning turmush sifati va ijtimoiy farovonligini oshirishga xizmat qilishini anglatadi.
Faoliyatda ochiqlik va shaffoflikning ta’minlanishi esa ishonch muhitini mustahkamlashda alohida rol o‘ynaydi. Maxsus shtab faoliyatining jamoatchilik e’tiboriga ochiqligi, nazorat mexanizmlarining oshkoraligi xalqni islohotlarga yanada ko‘proq jalb etadi, faollik va fuqarolik mas’uliyatini oshiradi.
Xulosa o‘rnida aytish mumkinki, bu tashabbus Yangi O‘zbekiston taraqqiyotining yangi, sifat jihatdan yuqori bosqichini boshlab berdi. Samaradorlik va javobgarlik madaniyatining shakllanishi, har bir sohada natijadorlikni asosiy mezon sifatida belgilash orqali davlat boshqaruvi tizimida amaliy o‘zgarishlar sodir bo‘lmoqda.
Prezident nazoratida olib borilayotgan bunday yondashuv — adolat, taraqqiyot va xalq roziligi tamoyillariga asoslangan yangi boshqaruv falsafasining ifodasidir. Shu bois bu tashabbusni butun jamiyat faollik bilan qo‘llab-quvvatlashi zarur. Chunki u bevosita har bir fuqaroga daxldor, har bir yurtdoshimiz hayotini yaxshilashga xizmat qiluvchi strategik harakatdir.
Xolmatov Muhriddin Mo‘min o‘g‘li
