O‘zbekiston va Vetnam: savdo, sanoat va madaniyat sohalarida o‘zaro faoliyatning kengayishi
O‘zbekiston Respublikasi Prezidenti Shavkat Mirziyoyev joriy yilning 7-aprelida mamlakatimizga rasmiy tashrif bilan kelgan Vetnam Milliy majlisi Raisi Chan Than' Man boshchiligidagi delegatsiya bilan uchrashdi.
Uchrashuv davomida, Vetnam Kommunistik partiyasi Bosh kotibi To Lam, Prezident Luong Kuong va Bosh vaziri Fam Min' Tin tomonidan yuborilgan salomlar delegatsiya rahbari tomonidan O‘zbekiston yetakchisiga yetkazildi.
Uchrashuv chog‘ida O‘zbekiston va Vetnam o‘rtasidagi munosabatlarning ko‘p qirrali tabiati, ayniqsa savdo-iqtisodiyot va investitsiya sohalarida ularni yanada rivojlantirish masalalari batafsil muhokama qilindi. Hukumatlararo va idoralararo muloqotlarga tizimli yondashuvni qo‘llashning zarurligi ta’kidlandi. Xususan, joriy yilda Hanoi shahrida bo‘lib o‘tadigan Hukumatlararo komissiya yig‘ilishi va biznes forumi muhim deb hisoblanmoqda.
Uchrashuv davomida energetika, geologiya, neft-kimyo, elektrotexnika, to‘qimachilik, qishloq xo‘jaligi kabi tarmoqlarda sanoat kooperatsiyasini oshirish maqsadida yangi loyihalarni ilgari surish uchun kompleks dastur ishlab chiqishga kelishib olindi. Bundan tashqari, madaniyat va turizm sohalarida almashinuvlarni, jumladan vizasiz rejimni joriy qilish orqali, rivojlantirishga alohida e’tibor berildi.
O‘zbekiston va Vetnamning parlamentlararo muloqotni faollashtirishga oid qo‘shma tashabbuslarning amaliy ijrosi muhokama qilindi. Ikki davlat 2025─2026- yillarga mo‘ljallangan iqtisodiy hamkorlikni rivojlantirish bo‘yicha rejasini qabul qildi.
O‘zbekiston investitsiyalar, sanoat va savdo vazirining o‘rinbosari Ilzat Qosimov va Vetnam sanoat va savdo vazirining o‘rinbosari Fan Ti Tang o‘rtasida muzokaralar bo‘lib o‘tdi. Ushbu uchrashuvda ikki tomonlama savdo-iqtisodiy hamkorlik masalalari muhokama qilindi. Jumladan, Toshkent viloyati Ohangaron tumanida yirik Vetnam kompaniyalari “Mareven Food Holdings” va “ROX Grup” bilan hamkorlikda oziq-ovqat mahsulotlari ishlab chiqarish va ko‘p funksional turar joy komplekslarini yaratish borasida muvaffaqiyatli hamkorlik qayd etildi. Energetika, geologiya, transport va turizm sohalarida hamkorlikni kengaytirishning muhimligi ta’kidlandi.
Keng qamrovli muzokaralar va kelishuvlar va kelgusida bo‘lib o‘tadigan tashriflarni sifatli tayyorlash chora-tadbirlarini o‘z ichiga olgan hujjatlar bilan mustahkamlandi. Tomonlar, o‘z davlatlari qonunchiligi asosida, uzoq muddatli ikkala davlat xo‘jalik faoliyatining subyektlari o‘rtasida tashqi iqtisodiy aloqalarni qo‘llab-quvvatlash bo‘yicha muzokaralar olib bordi. Ikki tomonlama iqtisodiy hamkorlik samarasi ming-minglab yoshlarimizga doimiy ish o‘rinlari yaratishning garovidir.
Norboev Odil Abraevich
TDIU “Iqtisodiyot nazariyasi” kafedrasi dotsenti
