SO‘Z BILAN VATANGA XIZMAT QILAYOTGAN ZAMONAVIY FIDOYILAR
Zamon o‘zgarmoqda, axborot maydoni esa borgan sari murakkablashib, kuchli ta’sirga ega qudratga aylanmoqda. Bugun dunyoda ro‘y berayotgan ijtimoiy-siyosiy jarayonlar, virtual muhitdagi tahdidlar, axborot urushlari va noto‘g‘ri ma’lumotlar oqimi fonida haqiqatni xalqqa yetkazish, xalq bilan davlat o‘rtasida ishonch ko‘prigini barpo etish — bu shunchaki kasb emas, bu fidoyilik, bu vatanparvarlikdir. Aynan shu sababli Prezidentimiz Shavkat Mirziyoyev 27-iyun — Matbuot va ommaviy axborot vositalari xodimlari kuni munosabati bilan yo‘llagan tabrigida jurnalistlar mehnatini “muqaddas sarhadlarimizda sergak turgan Vatan posbonlarining jasoratiga qiyoslasak, o‘ylaymanki, o‘rinli bo‘ladi”, deya alohida ta’kidladi.
Ushbu so‘zlar zamirida chuqur ma’no bor: bugungi jurnalist — u xabar yetkazuvchi emas, balki jamiyatdagi haqiqatni himoya qiluvchi, milliy manfaatlarimizni yot g‘oyalardan va noto‘g‘ri talqinlardan asrovchi, har bir so‘zi bilan xalqning qalbiga haqiqatni olib kiruvchi zamonaviy fidoyidir. Prezidentning tabrigida “bepoyon media olamda xolis va haqqoniy axborot tarqatish bilan birga, milliy manfaatlarimizni qat’iy himoya qiladigan jurnalist ahlining mashaqqatli mehnatini muqaddas sarhadlardagi jasorat bilan qiyoslash o‘rinli” ekani e’tirof etildi. Bu oddiy til bilan aytilgan yuksak baho emas, balki jurnalist kasbining jamiyatdagi haqiqiy o‘rnini belgilab beruvchi prinsipdir.
O‘zbekistonda matbuot sohasida keyingi yillarda yuz berayotgan o‘zgarishlar natijasida 2 400 dan ortiq ommaviy axborot vositalari faoliyat yuritmoqda, ularning 65 foizi nodavlat sektoriga tegishli. Internet nashrlari, bloglar, ijtimoiy tarmoqlar va onlayn platformalarning jadal rivojlanayotgani OAVning ta’sir doirasini kengaytiribgina qolmay, balki uni zamonaviylik, tezkorlik va ishonchlilik kabi talablar bilan yuzlashtirmoqda.
Shu bilan birga, jurnalistlar axborotning ishonchli va qonuniy manbai sifatida har doim professional bilim, media madaniyati va axloqiy mas’uliyatni o‘z yelkasida olib yurishga majbur. Chunki har bir noto‘g‘ri so‘z — milliy ruhiyatga, ijtimoiy ongga, hatto xalq birligiga salbiy ta’sir ko‘rsatishi mumkin.
Prezident tabrigida bu sohaning jamiyatdagi ta’siri haqida shunday deyilgan:
“Hech shubhasiz, ommaviy axborot vositalari xodimlarining mashaqqatli mehnatini qadrlash, ijodiy jamoalarni qo‘llab-quvvatlash, sohaning moddiy-texnik bazasi va kadrlar salohiyatini mustahkamlash bundan buyon ham Yangi O‘zbekistonda olib borilayotgan davlat siyosatining ustuvor yo‘nalishi bo‘lib qoladi.”
Bu yondashuv matbuotni faqat kommunikatsiya vositasi emas, balki ijtimoiy taraqqiyot, fuqarolik jamiyati va demokratik islohotlarning ajralmas bo‘lagi sifatida qaralayotganini ko‘rsatadi.
Bugun jurnalistlar axborot bilan ishlash jarayonida korrupsiyaga qarshi kurashish, yoshlar ongi va tafakkurini shakllantirish, so‘z erkinligi va qonun ustuvorligi tamoyillarini mustahkamlash, axborot madaniyatini yuksaltirish kabi ko‘plab strategik yo‘nalishlarda faol ishtirok etmoqda. Ayniqsa, bolalar va yoshlar kontentini rivojlantirish, sun’iy intellekt asosidagi media loyihalarni yaratish, internet axborot muhitini tartibga solish kabi dolzarb masalalarga alohida e’tibor qaratilmoqda.
Bunday yondashuv fonida jurnalist nafaqat xabardorlikni oshiruvchi, balki ijtimoiy ongni uyg‘otuvchi, milliy g‘ururni mustahkamlovchi, haqiqatga yo‘l ko‘rsatuvchi nurli qalb egasiga aylanmoqda. Uning jasorati frontdagi askarning metinligi bilan teng, farqi shundaki — u qurol emas, qalam tutadi; u komandir buyruq bilan emas, vijdon amri bilan harakat qiladi.
“So‘z bilan Vatanga xizmat qilayotgan zamonaviy fidoyilar” iborasi bugungi O‘zbekiston jurnalistlari obraziga to‘la mos keladi. Ular so‘z maydonining askarlari, jamiyat og‘riqlarini tilga olib, haqiqatni ifoda etish orqali xalq ishonchini qozonayotgan matonatli fidoyilardir. Prezidentimiz tomonidan berilgan e’tibor, e’tirof va baho esa bu sohaning kelajagi yanada porloq bo‘lishiga ishonch uyg‘otadi.
Botirova Sarvinoz Boburjon qizi
Toshkent davlat iqtisodiyot universiteti
Makroiqtisodiy siyosat va prognozlashtirish kafedrasi o‘qituvchisi
